Leef Vastelaovends vrun vaan ‘t Pothuiske.
Veer zien heij same gekoume um euze 12e prins vaan de Sjotelsplakke oet te rope.
’t Weurt de ierste kier in euze nuijen Hoftempel. Veer daanke Coen en zien team daan ouch, tot veer same, op dezelfde voot weijer kinne goon es wie veer dat geweend waore. Merci!
Heer heet us nog gehaold zjus veur de deadline vaan de transferperiode. T heet m ne flinke duit gekos. Veer goon dr same ‘ne sjieke Vastelaovend vaan make, zeker met dizze nuije Hoeglöstegheid.
Dizze prins weurd weer ‘ne sjoene, eine um noets mie te vergete. Nao ’n paar weke prakkezere höbbe veer weer ‘ne gesjikte gevonde. Veer zien daan ouch weer euvertuig dat heer us op zjuste weis veur zal goon in dees prachtige daog. En dat heer ouch de Mestreechter Geis geluifwierdig aon eederein zal oetdrage, zoe wie ziech dat ‘ne wierdige prins betaomp.
Enfin…. Euver wee höbbe veer ’t noe?
Euze prins is ‘ne volblood Mestreechteneer. Heer is in 1982 geboren aon de Rijershaag in De Heeg. Meh is opgegreujd tösse de krevatte en polo’s vaan Sint Pieter. Daor is heer bijmet zien broor en zuster opgegreujd bij zien leef awwers. En höbbe zien awwers ouch hun bes gedoon d’r get vaan te make.
Heer waor altied boete te vinde: oppe St.Pietersberg, in de grotte en achter de garaazjes op t veldsje. Heer heet vreuger eve geperbeerd um op hoeg niveau te voetballen (109m NAP), meh heer zoch liever naor de pieringe veur aon zien visgeert te haange. Heer waor zoewie zoe al väöl op en aon t water te vinde. Heer kump nog steeds gere bij Treech aon de Maos. Heer steit dekser op de lang latte, meh daan op t water.
Es apekeutel vraot heer vaanal oet op de lieger sjaol. Heer maakde eederein bröl. Nao de middelbaar sjaol is heer veur kok goon liere. Oeteindelik is heer ‘ne aandere weeg in geslage boe heer noe hiel väöl duite met verdeend. Daan kinste ouch prins weure…..
Heer heet hiel väöl interesses. Heer späölt nog gere met de Lego, um tot rös te koume. Heer bezeuk regelmaotig e festivalleke hei of daor. Heer geit t liefste met vrun vaanalles doen. Veur de Sjotelsplakke is heer zeker geine oonbekinde. Heer volg us al jaore trouw.
Heer heet vreuger es germin in de aofwas gewerk, in de horeca vaan
St Pieter. En drnao zellevers aon de kachel bij sjieke zake in Mestreech: Reube , Kuyp,Plaza…. En oeteindelik lang gewerk oppe Vriethof.
Zien huidige professie slut perceis aon bij de geis vaan de Sjotelsplakke: heer heet vaan ziene potsfiemel zien werk gemaak.
Heer geit ziene leste Vastelaovend es vrijgezel met make. Want zoe wiet geer allemaol wet, zien al zien veurgengers onmiddellijk veroverd.
De Sjotelsplakke zienhäöm absoluut neet onbekend. Heer is regelmaotig te vinde bij eus activiteiten.T is noe hoeg tied um aon uuch euze nuijje Hoeglostigheid bekind te make. Hei is heer daan, de twaalfde prins vaan de Sjotelsplakke, dames en hiere veer prizzentere uuch:
Prins Rachner d’n Ierste.
